Google Web Kuiergat

This page is powered by Blogger. Isn't yours?

My status

Enige terugvoer, kommentaar, kritiek, of net 'n boodskap is baie welkom. Skryf gerus vir my ; muisdruk hier Johann van Staden

Online dictionary at www.Answers.com

Tell me about:

Tuesday, March 21, 2006

 

Soos Hy neem, so gee Hy ook

Vandag, Maandag 20 Maart 2006. 'n Maandag soos baie ander. Alles dieselfde soos altyd. Alles tog ook heeltemal anders as altyd. Hartseer en vreugde. Soos soet en suur. Soos dag en nag. Soos die koms van die lente na 'n bitter koue, ongenaakbare winter. Voëltjies fluit en kwetter en bou nessies, en juig in die vreugde van sonskyn. Skielik, asof deur miljoene kabouterhandjies gehelp en aangevuur deur die belofte van lewe in son en lig en warmte, breek groen sprietjies deur barre grond, en bome word getooi deur skaam groenerigheid, wat binne dae en weke ons leefwêreld gaan omtower in 'n paradys van groen en kleur.

Aan die anderkant van die wêreld kruip winter-herfs ongemerk en byna slu, soos 'n dief in die nag, stadig, nader. Die son tree aan vir diens 'n paar minute later elke dag, en raak effens bleek om die kiewe. Asof skelm, draf die son ook al hoe vroeër laatmiddag effens vinniger om plek te maak vir aandskemer. So besef 'n mens byna nie dat die dag nou korter geword het nie, en jy reik ook onwillekeurig uit na daardie trui wat jy tog nie so lank gelede sommer so losweg in die hoekie van die kas gegooi het nie.

Vroegoggend vanoggend het die Here dit ook goed gedink om vir Neville te kom haal en huis toe te neem. Dit was te swaar vir Hom om te sien hoeveel pyn Neville gehad het, en om sy lyding te moes aanskou. Sy liggaam kon net nie meer die aardse pyne hanteer nie, en omdat Jesus goed is, en omdat Jesus lief is vir Sy kinders en hulle nie onnodig wil laat swaar kry nie, het Hy 'n spesiale engel Centurion toe gestuur om vir Neville gemaklik die pad terug te wys en te verwelkom in die Ewige Lewe waar hy geen pyn sal hê nie. My vriend, ou 'Loop-en-Val' Neville, nooit weer sal jy val nie. Nooit weer sal jy nodig hê om te onthou om jou pille te drink nie. Rus sag. Rus in ewige vrede.

Vandag het die Vader van alle lewe dit ook in Sy almagsplan gehad om vir Hannelie en Dewald hulle lankverwagte prinsessie te gee. Dehanné van Staden het vandag die lewenslig aanskou, nadat Hannelie en Dewald ook baie lank moes wag. My ou Boetie en Sussie, ons is saam met jullle bly - en trots - en dankbaar ! Ons het nie aldag verstaan hoekom dit so lank moes neem nie, maar vandag weet ons dat dit reg was. Prys die Heer ! Mag hierdie pragtige bondeltjie genade ook vir julle en ons almal vreugde bring, en 'n ligstraaltjie elke dag wees, oral waar sy gaan. Mag julle so spesiaal vir haar wees soos wat sy vir julle is.

Soos die Vader neem, so gee Hy ook veelvoudig. Ons wik, maar God beskik.


Comments>
Hallo Johann, bly saam met jou! Jenoob Kuwait.
 
Ek wil ook net se dat daar "mixed emotions" by ons was hierdie maandag. Ons het ook die voorreg gehad om vir Neville te kon ken vir 'n kort tydjie. Net soos ou Alwyn, was hy nooit "af", of "lelik kwaad" of ongeskik soos ons "normale ???" mense soms raak nie. Hy was altyd beskikbaar om te help, en so sou hy net sy beste gee. Ons is soos Johann gese het baie armer sonder hom, maar in dieselfde asem wil ek in my gebrokenheid se dat ek glo hy nou werklik saam met ons Skepper leef. Net ook iets oor Dewie en Lillie se geskenk en wonderwerk. Indien daar van ons is wat ooit in donker oomblikke sou twyfel, word dit op hierdie maandag weg gevat. Al baie het ek gehoor dat God se tyd, nie ons tyd is nie, maar so in die hedendaagse moderne gejaag word dit waar. Dan wil ek ook net vir my Ouboet komplimenteer met sy skryfkuns. Ek het al baie gewonder wat daar in die verre Duitsland aan die gebeur is. Nou begin dit vir my lyk asof hy so in die stille besig is om 'n boek te voltooi. Maar ons geniet dit, so doe so voort, ons stem saam met jou.
 
Post a Comment

<< Home